Jendez lepo zegoen bart Amurrio Antzokia, Udalak estreinakoz antolaturiko Amurrioko Kirol Galan. Herriko kirolari eta elkarteak saritu zituzten, Musika Eskolak, Kuskua elkarteak edota Aimara antzerki taldeak girotutako ekitaldian.
Amurrioko Txirrindularitza Eskola, Amurrio Club, Saraube Saskibaloi Taldea, Pelotazale Elkartea, Oinkariak, Ezina Ekinez Egina edota Aresketa Gimnasia Taldea igo ziren oholtzara, urtean zehar egindako lanaren aitortza jasotzera.
Baina kirol talde eta klubetatik haratago izen propioz jositako gala izan zen. Ane Ramos patinatzaileak, Izaskun Bengoa eta Mirari Gotxi txirrindulariak eta Eliseo Iturburu eta Koldo Gabiña Etorkizuna eta Kaskagorri futbol taldeetako kideek saria jaso zuten ere, kirol munduan egindako ibilbideagatik.
Sarituekin batera askoz gehiago izan ziren ere oholtzatik pasa ziren kirolari ezagunak. Besteak betse, Hodei Muñoz Euskaltel Euskadiko txirrindularia, Iker Larrazabal pilotaria, Jose Maria Baualdo txirrindulari ohia edota Iñaki bea futbol entrenatzailea. Juilian Iantzi telebista aurkezleak ere agerpena egin zuen bideo bidez.
Argazkiak: Aimar Gutierrez Bidarte