Arakaldoko Udalak, herriko historia, kultura eta natura ondarea ezagutarazteko asmoz zein naturan kirola egitea eta ohitura osasungarriak sustatzeko xedez ekin dio “Arakaldo Sustraiak Aurkitzen” egitasmoari. Gaur aurkeztuko dute 18:30ean udaletxean ekimena.
Bere helburuak lortzeko, 4 ibilbide landu eta 4 ibilbideetan seinaleak eta informazio-panelak ezarri dituzte.
Arakaldoko interes historikoa eta toponimikoa duten lekuak zeharkatzen dituen ibilbide bat ere aurkeztuko dute, eskualdeko “Zuztarretatik ahora” egitasmoaren barruan sortu den bideo baten bitartez.
Era berean, Arakaldo herritarrek kirola eta mendiarekiko ohitura osasungarriak bultzatu nahi dituztenez, aipatutako proiektuaz gain, herrian eratzen ari den mendi eta kirol klubaren nondik norakoak azalduko dituzte.
Hurrengoa izango da aurkezpenaren egitaraua:
. Proiektuaren aurkezpena eta zergatiak (Udal arduradunak).
· Ibilbide toponimiko eta kulturalaren bideoaren aurkezpena (Jon Bollar, Arakaldoko euskara teknikaria eta Labayru Ikastegiko arduradunak, bideoaren sortzaileak).
· “Kukutze mendi eta kirol kluba”ren sorreraren berri (Mendi taldeko kideak).