Udaltalde21-ek Nerbioi Goiena eskualdeko herri bakoitzeko jasangarritasun egoera aztertu du. Txosten horretako datuekin pozik azaldu dira Arakaldotik. Izan ere, eskualdeko antzeko udalerrietako batez bestekoa baino hondakin gutxiago sortzen dituzte. Gainera, urtez urte hondakin gutxiago ekoizteko joera ikusten da.
Era berean, berotegi-efektuko gasen kasuan isuriak eskualdeko udalerrietako batez bestekoa baino txikiagoa da, nabarmen gainera.
Hala ere, hobetu beharreko neurgaiak ere azaltzen dira txosten horretan. Esate baterako, gaikako bilketaren bidez jasotako hondakinei dagokienez, batez bestekoaren gainetik dago Arakaldoko neurgaia; alabaina, birziklapen bolumena jaitsi da pixka bat urte batetik bestera.
Halaber, etxeko gas natural eta elektrizitate kontsumoa urtez urte murrizteko joera igartzen bada ere, inguruko herrietako batez bestekoa baino kontsumo handiagoa daukate arakaldarrek.
Udaltalde 21-en webgunera jo daiteke Arakaldoko tokiko jasangarritasun egoeraren eskema ikusteko.