Atzo Arakaldon kokatuta dagoen Norten enpresako ateak ireki ziren berriz eta makinak piztu. Izan ere, langileek eta enpresako zuzendaritzak hitzarmena lortu zuten 14 greba egun eta gero. Horren ondorioz, enpresako hitzarmena luzatu da 2014 urterako eta enpresak ezin izango du espainar estatuko lan erreforma aplikatu 2017ra arte.
Enpresako langileak oso pozik agertu dira lorpenarekin eta eskerrak eman dizkiote Arakaldoko Udalari eta jende guztiari emandako babesagatik, haien esanetan, erretzeko egurra, edaria eta janaria eraman dio jende askok, animoak eta babesa adierazteaz gain.
Hitzarmena lortzeko zioa, langileen ustez, azken egunetan enpresako zuzendaritzak jaso duen presioa izan da. Athletic Clubek, Eusko Jaurlaritzak, Bizkaiko Foru Aldundiak, Bilboko Udalak eta Kutxabankek osatzen duten San Mames Barria S.L erakundeak egun bateko epea eman zion Norten enpresako zuzendaritzari arazoa konpon dezan, era horretan San Mames berrian obrak normaltasunez jarraitu ahal izateko.