Asteburu honetarako ekintza ezberdinak planifikatu ditu Udalak. Lehenengoa larunbatean izango da, urriak 19. Arakaldoko Udalak eta "Udaltalde 21 Nerbioi-Ibaizabal" erakundeak Nerbioi Ibaiaren ibaiertza berreskuratzeko jardunaldia antolatu dute elkarlanean. Egun horretan Ibaiertzeko balio naturalak ezagutzeko parada egongo da eta auzolanean, teknikarien laguntzarekin, landare exotiko inbaditzaileak kendu eta bertako espeziak landatuko dira. Hitzordua goizeko 9:30etan izango da eta topalekua Usilarra parajean, tren geltokiaren aurrean, Gorostidi altzari dendaren ondoan.
Euskaraz bizi nahi dut
Bigarrena, igandean izango da, "euskaraz bizi nahi dut" kanpainaren harira, Arakaldon antolatuko da urriaren 20an euskaraz bizi nahi dut eguna, beste herri batzuetan ez bezala, herri honetan ez da lasterketa bat egingo, frontoian esku-pilota partiduak baizik.
Goizez pilota tailer bat egingo da Bilbao Jai Alairen eskutik, tailer horretan pilota modalitate aniztasuna irakatsiko dute, adin guztietako pertsonentzat bideratuta dago. Arratsaldez esku-pilota partidu ezberdinak egingo dira goizez izena eman duen jendearekin. Nahiz eta esku-pilotan inoiz ez jokatu izena eman daiteke, goizez egongo delako ikasteko aukera hasiberrientzako pilotekin. Tailerrak edozein adineko pertsonentzat prestatuta daude.