Arakaldon larunbat honetan ospatuko dira inauteriak. Herri txiki honetan herritar gehienek hartu dute parte jaia aurrera ateratzeko, eta antolatu diren asanbladetan zein posta elektroniko eta sakelako telefonoaren bitartez mozorrotzeko ideia ezberdinak proposatzen eta hautatzen joan dira. Azkenean komiki pertsonaia izan da aukeratutako gaia. Beraz, komiki bizidun bihurtuko da Arakaldo arartsaldeko 17:30etatik aurrera. Izan ere, hori da hitzordua herriko plazatik irtetzeko eta herriko auzo ezberdinetatik igaroteko dantzan eta algaran Kun Kun batukadak lagunduta. Atsedena eta indarrak hartzeko Errekagain hotelean pote bat hartu eta etenaldi bat egingo dute. Ondoren, berriz herriko erdigunera itzuliko dira eta herriko Errekatxu Txokoan guztiontzako azkaria prestatuko da.
Arakaldotik benetan eskerrak eman nahi dizkiete lagundu duten guztiei, bereziki Laudioko Kun Kun batukadari egun horretan etortzeko eta jaia alaitzeko erakutsi duten prestutasunagatik, baita ere eskerrak eman nahi dizkiete Txato eta David trikitilariei jaian parte hartzeko euren burua eskaini dutelako. Hala, bada, perkusioaren erritmoak ez ezik trikitixaren doinu alaiak ere dantzan jarriko ditu Arakaldoko komiki pertsonaia bizidunak zein Arakaldora egun horretan gerturatzen diren beste pertsonai guztiak.