Udalbatza egon zen atzo Arakaldon eta erabaki garrantzitsua hartu zuen erakundeak energiari dagokionez. Izan ere, EH Bilduko lau bozekin eta EAJko bakarrarekin adostu zuten Iberdrola enpresarekin duten harremana bertan behera uztea eta elektrizitate horniketa Goiener kooperatibarekin kontratatzea.
Horretarako, tokiko erakundea Goienerreko bazkide bilakatuko da. Jabi Asurmendi alkateak argudiatu du agian zerbitzua apur bat garestiagoa izango dela, baina horrela bermatuko dutela kontsumitzen duten energia iturri berriztagarrietatik lortzen dela. Bide horretatik, EH Bilduk eta EAJk akordioa lortu zuten aztertzeko zein urrats eman ditzakeen udalak askitasun energetikoaren bidean.
Likidazioa eta .eus domeinua, besteak beste
Edonola ere, gai gehiago landu ziren udalbatzan. Esaterako, 2017ko likidazioa onartu zuten; 16138,13 euroko soberakinekin bukatu zuten urtea.
Bestalde, Arakaldoko Udalaren webguneak .eus domeinua erabiltzeko ordenantza onartu zuten. Bukatzeko, alkateak hitza hartu zuen Altsasuko gazte auziperatuei elkartasuna adierazteko, atzo hasi baitzen epaiketa Madrilgo Entzutegi Nazionalean.