"Ia hiru urteko lanaren ondoren" lortu dute zuntz optikoa jartzea Arakaldon. Hala azaldu du Jabi Asurmendi Sainz alkateak. Tarte horretan negoziaketak egin behar izan dituzte: "Eztabaida eta borroken ondoren lortu dugu zuntz optikoa. Lana ez da amaitzen, orain herri osora zabaltzea dagokigu, baina urrats erraldoia eta zailena eman da".
Zehazki, udaletxera eta etxe gutxi batzuetara iristea lortu dute, erdigunera. "Behin hori eginda Movistarrekin negoziatuko dugu berriro, hurrengo urtean herri osora zabaltzeko".
Negoziaketa luzea eta zaila
Prozesuari dagokionez, erakunde eta enpresa ugarirekin negoziatu behar izan dute. Horien artean daude Movistar edota Adif. Izan ere, instalaziorako trenbide eta errepidea gurutzatu behar ditu zuntzak. Horrek sortu dizkie arazo gehien.
Komunikazioaren harira isolatuta egon da Arakaldo, Asurmendiren ustez: "Guri iristen zaigun sarea oso konexio kaskarrekoa da. Horregatik hasi ginen irtenbide bila: satelite bidezko konexioa... Lehiaketa Movistarrek irabazi zuen, eta horretara jarri ginen". Foru Aldundiak pausatu zuen proiektua orduan, lehen instalazioak abiatzean baimena ukatu baitzion Movistarri. Dena den, negozioazioen ondorioz, beharrezko baimenak eskuratu zituzten.
Adif eta Renfe oztopo
"Horren ostean traba handiena Adif eta Renfe izan dira. Trenbidea zeharkatu behar zuen kableak, errepidearen gaineko zubitik". Hori dela eta, Renfek 100.000 euroko bermea eskatu zion Movistarri, bi arrazoi argudiatuta: trenbide gainetik igarotzea, eta zuntz optikoak sor zitekeen balizko arazoa.
Horrez gain, Adifek langile bat jarri zuen instalazio fasean azpiegitura ez kaltetzea ikuskatzeko, eta hori ere ordaindu behar izan zuen Movistarrek. "Movistarrek, hori ikusita, prozesuarekin zalantzak agertu zituen, ia atzera botatzeraino. Negoziaketen ondorioz lortu dugu Movistarrek baldintza horiek guztiak onartzea", aipatu du alkateak.
Horretarako Adifekin jarri zen harremanetan Udala. Tokiko erakundeak trenbidea izateak eragiten dituen oztopoak jakinarazi zizkion gutun bidez Adifi: "Errepideko lur jauziak trenbidean, zarata, baimen oztopoak... Gainera, herriak ordaindutako geltokia da, ez Adifek. Zerbitzua eta erabiltzaile kopurua oso eskasa da. Erantzuna oso formala izan zen. Renfek zenbait obra egin ditu guri jakinarazi gabe".