Bolatokian egingo dute aurtengo Arakaldoko obra nagusia. Hala proposatu zuen udal gobernu taldeak atzo eginiko herri batzarrean, eta bertan onartu zen ideia.
Estalkia jarri nahi diote kirol-azpiegituraren zuloari, espazioa beste jarduera batzuetarako ere erabili ahal izateko. “Estalkiak eserlekuak ditu, kenduta dagoenean erabili ahal izateko”, azaldu du Jabi Asurmendik.
Bizkaiko Foru Aldundiari eskatuko diote obra hori egiteko diru-laguntza. “Iaz zubia irisgarri bihurtzeko eskatu genuen dirua; duela bi urte, aldiz, umeentzako parkea estaltzeko”, oroitu du alkateak, “urtero eskatzen dugu diru-laguntza hori. Gainera, dirua sobratzen bazaigu, bolatokiaren albotik doan erreka garbitzen saiatuko gara, URAren baimenarekin, haur zein nagusientzako espazio bat bilakatu ahal izateko. Parke parte hartzaile bat sortzea ere baloratu ahalko genuke etorkizunean”.
Tasa eta zergen igoera
25 pertsona inguru bertaratu ziren herri batzarrera, Asurmendik zehaztu duenez. Beste gai batzuk ere izan zituzten hizpide bertan, tasa eta zergak kasu. “Hainbat urte egon dira ukitu gabe, eta aurten gainontzeko herrien mailara igotzea proposatu dugu. Jendeak ulertu eta ondo hartu du erabakia”.
Beste gai batzuetaz ere hitz egin zuten bileran. Udalak duen pisu bat etxebizitza gisa lehiaketara ateratzea erabaki zuten, eta kaleko katuei janaria ematea mugatzea eta animalia horiek babesten dituen elkarte bati diru-ekarpena ematea ere adostu zuten, populazioa asko handitu delako azken urteetan.
