Tokiko elikagaiak nola prestatu ikasteko ikastaroa eskainiko du Nagore Lazaro nutrizionistak datorren urriaren 31n Arakaldoko udal txokoan. 17:00etatik 19:30era luzatuko da saioa. Parte hartzeko beharrezkoa izango da 50 euroko matrikula ordaintzea.
Parte hartzaile guztiek errezeta liburua jasoko dute, tailerrean ikasitakoa etxean praktikan jarri ahal izateko. Urriaren 25a baino lehen eman behar da izena Whatsapp mezu bat (688 78 07 01 edo 607 43 44 52 telefonora) edo info@errilur.info helbidera idatzita.
14 pertsonentzako aforoa egongo da, eta uneoro errespetatu beharko dira COVID-19aren aurkako segurtasun neurriak. Horrez gain, haurrak zaintzeko zerbitzua eskainiko da, aldez aurretik abisatuta. Nabarmendu dutenez, plaza gutxi geratzen dira libre.
Tokiko eta garaiko elikagai ekologikoekin “plater berriak eta berritzaileak” egiten ikastea da antolatzaileen helburua. Sukaldeko ezagutzaren transmisioa galtzen ari dela uste dute Errilurreko kideek, “herritarrak fast-foodera kondenatuz”.
Horregatik egin dute ikastaroa, bertan ikasitakoa gero egunerokoan praktikan jarri ahal izateko. “Hizlaria sukaldaria eta nutrizionista da. Beraz, aholku batzuk ere emango dizkigu, elikagaiak nutrizio aldetik orekatzeko”.
Ekimen gehiago
Urriaren 31koa ez da ekimen isolatu bat izango, aurreratu dutenez: “Aurrera begira gehiago antolatuko ditugu, ekoizpenari zein kontsumoari begira”.
Elikadura burujabetzak horrelako ekintzen beharra duela azpimarratu dute. “Hurrengoa hausnarketa jardunaldi bat izango da. Berriki argitaratutako txosten baten arabera, baserritarren %60 ez da heltzen soldata minimoa izatera, asteko 52 ordutako jardunaldiak betetzen dituen eta etxekoen debaldeko laguntza jasotzen duen arren. Honek hausnarketa eta konponbidea behar ditu”.