Arakaldoko Jai Batzordeko kideek badute prest aurtengo jaien egitaraua. Aurreratu dutenez, uztailaren 12, 13 eta 14an pilatuko dira ekintza gehienak, eta azken urteetan nagusitu den eskema jarraitu dute. Ostiraleko txupinazoaren eta kontzertuen ostean, larunbat arratsaldean tortilla txapelketa izango da ekintza esanguratsuenetako bat. Urtero bezala, dozenaka lagunen parte hartzea espero dute antolatzaileek, eta haurrentzako parkea zein bola jaurtiketa ere egingo dituzte aldi berean, herria are gehiago girotzeko.
Gauean, aldiz, kontzertuak egongo dira, adin guztieko pertsonentzat pentsatutakoak. Alde batetik, umeeak animatzen bereziki trebea den Xaibor arituko da dantzan, eta Patricia Recless & The Pushermenek emango diote rock ukitua jaiari. Igandean, aldiz, kirol erakustaldiak egongo dira goizean, Betijai fanfarreak giroturik. Ondoren, herri bazkaria egingo dute, eta modu horretan amaituko da jaien zati nagusia. Ofizialki, lau egun beranduago amaituko dira jaiak, hurrengo ostegunean, mezarekin.
EGITARAUA
Uztailak 12, ostirala
19:00 // Txupinazoa, buruhandiak, txorizo eta odolosteak
21:00 // Gautaegun erromeria eta DJ AZID
Uztailak 13, larunbata
10:30 // Txistu kalejira
12:00 // Etxebarria aita-seme trikitilariak
12:30 // Buruhandiak
13:00 // Txapa tailerra eta apar festa
17:30 // Haurren parkea
17:30 // Tortilla txapelketa
18:00-20:00 // Bola txapelketa
18:00 // Dantzak
19:30 // Tortillen entrega
20:00 // Txokolate-jana
21:00 // Xaibor eta Patricia Recless & The Pushermen
Uztailak 14, igandea
10:30 // Txistu kalejira
10:30 // Haurren pilota erakustaldiak
11:00-13:30 // Bola jokoa
12:00 // Betijai fanfarrea
12:00 // Herri kirolak
12:00 // Igel txapelketa
14:30 // Herri bazkaria
Uztailak 18, osteguna
12:00 // Meza eta, jarraian, pintxoak eta trikitia
