ADOS plataformak mozioa sustatu du udalean EH Bildu eta EAJ alderdien babesarekin, eta ostegunean landuko dute arratsaldeko 19:00etan. Helburua da aurrera egitea erabakitzeko eskubidearen norabidean, 2014ko azaroaren 2ko herri galdeketaren ostean. Taldeak gogoratu du Arrankudiaga-Zolloko herritarren gehiengoak burujabetzaren aldeko hautua islatu zuela bozkaketan; biztanleen % 61,59ak parte hartu zuen egitasmoan eta % 89,64ak baiezkoa erman zion “Nahi duzu euskal estatu subirano bateko herritar izan?” galderari.
Bi urte igaro eta gero, ADOSek nahi du mugarri historikotzat hartzea ekimena, eta horretarako proposatu du Etxarri-Aranatz udalerriarekin senidetzea. Berez, biak izan dira aitzindari esparru horretan, bata EAEn eta bestea Nafarroan, alegia. Plataformaren ustez, Euskal Herriaren zatiketa gainditzeko neurri aproposa da eta seinaleen bidez adieraziko dute herrian, bistakoa izan dadin. Alabaina, nabarmendu dute Etxarriko herritarrek modu aktiboan lagundu zutela Arrankudiaga-Zolloko galdeketaren prestaketetan.
Azaroaren 6an urteurren ekitaldia
Horrez gain, udalari eskatu diote parte hartzeko azaroaren 6ko ekitaldian, plaka jarriko baitute. Berez, nahi dute horretan zein gainerako ekintzetan erakundeko ordezkariak aritzea, zenbait ekintza antolatuko baitute II. urteurrena ospatzeko. Nahiz eta hitzordu gehienak zehaztu dituzten, guztiak berretsi arte ez dute egitarau osoa plazaratuko.
ADOSek azpimarratu du 1.979an Arrankudiaga-Zolloko Udalak independentzia aldarrikatu zuela eta 2014an burujabetasunaren aldeko adierazpena egin zutela berriro.