Arrankudiaga-Zolloko bosgarren Trail lasterketa berrikuntzaz beteta iritsiko da larunbat arratsaldean eskualdera. Izan ere, Aritz Irabazabal Ugaoko aizkolariak lasterkari guztiei desafioa bota die: 14 kilometroko bidea, berak 14 enbor moztu baino lehenago ezetz bukatu. Apustua 16:30ean hasiko da, lasterketarekin batera. Hala, Arrankudiagako plazan kokatuko da aizkolaria, gainontzeko partaideak Arrankudiaga eta Zollo arteko maldetan barrena korrika doazen bitartean.
Antolatzaileek giro herrikoia eman nahi izan diote aurtengo edizioari. Hori dela eta, 19:30etik aurrera Nafarroa Kantu Taldearen emanaldia izango da Arrankudiagako plazan. Lasterketa IV.Basahauntza Trail Zirkuituaren barnean dago, eta izen-emateak 5 euro balio ditu. Horretarako, www.sailkapenak.com webgunean apuntatu beharra dago. Dena den, egunean bertan ere apuntatu ahalko da 10€ ordainduta.
Egitaraua
Kirolariak 14:30etik 15:45era bertaratu beharko dira dortsalak jasotzera. 16:00etan, aldiz, txikien krossa egongo da, jaiotza urtearen arabera metro kopuru ezberdina zeharkatu beharko dituztelarik, txikienek (2013tik aurrera jaiotakoek) 200 metroko zeharkaldia egingo dute, eta handienek (2005-2006 urtekoek) 600 metro. Lasterketa nagusia 16:30ean hasiko da elizaren aldamenetik, eta leku berdinean egongo da helmuga puntua.
Ibilbidearen ezaugarriak
Fitxa teknikoari dagokionez, 14 kilometroko luzeera izango du bideak, eta 1.005 metroko malda metatua. Bide motei erreparatuz, lurra izango da nagusi zirkuituaren %50ean, asfaltoa %30ean eta bidezidorra %20an. Antolatzaileek aurreratu dutenez arropa zaintzeko zerbitzua egongo da, baita dutxatzeko aukera ere. Horrez gain, probaren amaieran nola jateko hala edateko eskaintza luzatuko diete partaideei.