Renfek hasi ditu dagoeneko Arrankudiagako geltokiko lanak eta, printzipioz, 8 hilabetez luzatuko direla aurreikusi du. Horrela, herritarrek egindako eskaera historikoari erantzun dio enpresak.
Obrak hiru esparrutan eragingo du: nasara heltzeko irisgarritasuna egokituko du, eta aldi berean nasak hobetu eta aterpeak berrituko ditu. Hori gauzatzeko, arrapalak eta eskailerak eraikiko dituzte eta biek beteko dute irisgarritasunerako araudia.
Horrez gain, nasak berriro margotu, zabaldu eta igoko dituzte, trenaren altuera aintzat harturik. Bukatzeko, aterpeak ere moldatzeko asmoa dauka Renfek.
Udala eta Renferen harremanak
Azken hilabeteetan komunikazio oparoa izan dute Arrankudaga-Zolloko Udalak eta trena kudeatzen duen enpresak. Berez, duela hilabete batzuk, hau da, obrak hasi baino lehen, Renfek zenbait aldaketa tekniko proposatu zituen proiektuan.
Zehazki, enpresak erabili nahi zituen zenbait lursail publiko, udalarenak, hain zuzen. Tokiko erakundeak egitasmoa aztertu zuen eta, azkenean, ezezkoa eman zion Renferi. Udal gobernu taldeak argudiatu zuen aldaketak ez ziola onurarik ekarriko herriari. Izan ere, horren ondorioz Uribarriko bidea estutuko lukete eta edukiontziak lekuz aldatu ez ezik, aparkaleku bat ere galduko lukete herritarrek.
Hortaz, hasierako proeiktuari eutsiko diote. Egitasmoa 2011koa da eta denbora luzez geldirik egon da. Hala ere, hilabete gutxi igaro dira Renfek udalarekin harremanetan jarri zenetik.
Nabarmentzekoa da Ugaoko eta Arrigorriako geltokietan ere lanean diharduela enpresak antzeko helburuak lortzeko. Dena den, Renfek ez du ezer iragarri Laudioko, Amurrioko edo Urduñako geltokiei dagokionez.