Abuztuaren 14ean hasiko dira Arrankudiagako Jaiak, baina festak berez lehenago abiatuko dira, herriko nagusientzat bereziki, datorren larunbatean (abuztuak 8) izango baita Nagusien Eguna.
“Batzuetan 14ean egin izan dugu egun hori”, azaldu du antolakuntzan dabilen Miren Eskalza Ellakuriak, “baina beste ekintza batzuk daude, eta elkar zapaltzeko arriskua dago”.
Jubilatuen bazkaria da Nagusien Eguneko ekimen nagusiena. 90 pertsona inguru gerturatzen direla dio Eskalzak. “Elbarrituak dauden herritar batzuk falta izaten dira”, argitu du.
Bazkariaz gain, beste hainbat ekimen ere egiten dituzte egunean zehar: Nagusientzako jokoak (XXI. edizioa aurten), bola-joko txapelketa, kantuak, dantzak... “Nagusi askok nahiago dute bazkaldu ostean deskantsatu”, azaldu du Eskalzak, “baina badaude dantza egitera animatzen direnak ere”.
Mende laurden baino gehiago
Gizarte Etxea elkarteak antolatzen ditu egun horretako ekintzak. “Ehun bazkide inguru izango ditu elkarteak”, aipatu du Eskalzak, eta gaineratu aspaldikoa dela Jubilatuen Bazkaria egitearen ohitura; “duela 25 urte baino gehiago hasi zen antolatzen”.
Jaietako gainontzeko egunetan, baina, herriko nagusien parte hartzea txikia dela aitortu du elkarteko kideak. “Arrankudiaga oso herri sakabanatua da, eta nagusi asko ezin dira baserrietatik euren kabuz jaitsi”.