Gaur jarri dute Arrankudiaga-Zolloko udaletxean ikur espainiarra. Espainiar Gobernuko Ordezkarien aginduaren -Mikel Cabiecesek 2011n bideratutakoa- aurkako helegiteak agortu ostean, gaur bukatu da ikurra jartzeko epea.
Atzo egindako udalbatzan adierazpen instituzionala onartu dute EAJ eta Bilduk Espainiako Gobernu Ordezkaritzara helarazteko. Adierazpen horretan alderdiek azpimarratu dute Arrankudiaga eta Zolloko Udaleko zinegotzi abertzaleek osatu dutela. Horren adibidea ere Ados plataformak antolatutako galdeketa ere badela aipatu dute.
Inposizioa
Modu berean, Arrankudiaga eta Zolloko herritarrentzat espainiar ikurra eskubideen ukazio, inposizio, jazarpen eta errepresioa adierazten duela erantsi dute. Eta zentzu horretan iraintzat jotzen dutela ikurra udaletxean jartzea azpimarratu dute.
Ikur espainiarraren aurrean Ikurrina aldarrikatu dute udalerriko herritar guztiak batzen duen sinbolo gisa.
Mehatxuak
Bildu eta EAJko ordezkarien idazkiak azaltzen du ikurra zigor mehatxupean jarriko dutela eta horrek oinarrizko joko demokratikoa bortxatzen duela.
Udalbatzan aritzen diren zinegotziek aitortu dute adierazpenaren bitartez inposizio horrek haserrea eta inpotentzia sortzen diela baina herritarren borondatea eta erabakitzeko eskubidea defendatzeko konpromisoa berresten dutela.