ADOS plataformak Arrankudiaga-Zollon azaroaren 2an antolatutako galdeketan, herritarrek erantzun beharko duten galdera hurrengoa izango da: “Nahi duzu euskal estatu subirano bateko herritar izan?”
Boza emateko zenbait baldintza bete beharko dira; Arrankudiaga-Zolloko biztanleei bakarrik utziko zaie parte hartzen eta 16 urte izan beharko dituzte gutxienez. Informazio hori berresteko NAN, gidabaimena, EHNA edo pasaportea -guztiak eguneratuak- erakutsi beharko dute parte-hartzaileek. Agiri horiek iraungita egongo balira eta Arrankudiaga-Zolloko biztanlea dela bermatzeko errolda-ziurtagiria beharrezkoa izango da. Udaletxean eska daiteke eta ezin izango da 2014/10/1ekoa baino lehenagokoa.
Galdeketan erabiliko diren boto-txartelak eta gutun-azalak antolatzaileek banatuko dituzte herriko etxeetan. Ados plataformak azaroaren 2an Elexalden jarriko du hauteskunde-mahaiko hautestontzia. 09:00etatik 20:00etara hurbildu daitezke herritarrak.
Boza sekretua eta auzoetako hauteskunde-mahaiak
Hala ere, auzoetan eta boza sekretua emateko parada ere eskainiko du plataformak; pertsona gaixoei, adinekoei edo azaroaren 2an kanpoan daudenei ahalbidetuko zaie haien iritzia ematea boza sekretuaren bidez. Horretarako kontsulta antolatzen dutenekin harremanetan jarri beharko dira interesdunak.
Zolloko auzokideek azaroaren 1ean bozkatu ahal izango dute: 11etatik 12etara Ustaran; 12etatik 13:00etara, Aspiuntzan; 13:00etatik 13:30era, Zollourrutin, eta 13:30etik 15:00etara, Elexalden. Atxetan boto sekretu aurreratua emateko parada izango dute egun berean, plazan, arratsaldeko 5:00etatik 8:00etara.