Urtero bezala, aurten ere herritar talde bat bilduko da Arrankudiagan, helburu komun bat auzolanean gauzatzeko asmoz: Berakatz Egunean jan ohi diren odolosteak prestatuko dituzte.
Auzolan horretan parte hartzen duten kideek azpimarratu dute odolosteak prestatzearena “lan izugarria” dela. 200 kilo odolki prestatzen dituzte, 1000 odoloste inguru egiteko. Hala ere, antolatzaileak ziur dira aurten, aurreko urteetan bezala, 15-20 pertsona inguru bertaratuko direla lanera. Eta ez nagusiak bakarrik: “Jende gaztea ere bertaratzen da, odolosteak nola egiten diren ikastera batez ere”, azaldu dute. Bakoitzari lan zehatz bat egokitzen zaio odolosteak egitearen prozesuan, baina lana denon artean egiten dutela adierazi dute antolatzaileek, “giro onean”. Horregatik, herritarrak auzolanera bertaratzera animatu nahi dituzte, “geroz eta jende gehiago izan orduan eta errazago suertatzen da lana egitea”.
Jaietako azken egunean, Berakatz Egunean, odolosteak jateko ohitura dago. Auzolanean prestatutako odoloste gehienak Gizarte Etxean kozinatu eta zerbitzatuko dira. Beste kopuru txikiago bat, berriz, “etxean afaldu nahi duten auzokideei” salduko diete, “pertsona nagusiei batez ere”.
Jatorria, Gizarte Etxean
Odolosteak auzolanean prestatu eta jatearen ohitura Gizarte Etxeari lotua dago, 1979an sortu zena. Lehenago ere bazegoen herrian odolosteak afaltzearen ohitura, baina bakoitzak bere baserrian egin eta jaten zituen, antolatzaileen esanetan. Orain, berriz, herriko zein herritik kanpoko jendea bertaratzen da afaltzera. “Badago urtero-urtero herrira odolosteak jatera bertaratzen den jendea. Laudiokoa bezala, zita garrantzitsua bilakatu da Arrankudiagakoa ere”.
Ospeak ospe, odolosteak ohiko osagaiekin prestatzen dituztela ziurtatu dute antolatzaileek: odola, arroza, koipea, porrua, kipula, perrexila, gatza eta pipermina.
Festazaleentzako, berakatz zopa
Izenak dioen bezala, berakatzek ere presentzia handia dute Berakatz Egunean. Jaietako egun potoloa izan ohi da eta ugariak izango dira herritik ibiliko diren parrandazaleak. Goizeko bostetan bertatik dabiltzanek berakatz zoparekin tripa berotzeko aukera izango dute. Urtero egiten den errituala da; eta, berakatzaren eta kalimotxo edota garagardoaren arteko kontrastea bortitzegia suertatu daitekeen arren, zoparena ekimen arrakastatsua dela ziurtatu dute antolatzaileek.