Herri askotan daude Kofradiak. Tradizionalki herritar katolikoen bilgune izan diren arren, herriaren arabera garapen ezberdina izan dute. Arrankudiagako kofradiaren kasuan, adibidez, ez dago noiz sortu zen zehazten duen dokumenturik. Kofradiako kideetako batzuek 250 urte baino gehiago dituela diote. Beste batzuk Laudioko Kofradia baino zaharragoa dela esatera iristen dira, Laudiokoak 400 urte baino gehiago dituenaren jakitun.
Laudion bezala, Arrankudiagan ere bazkaria antolatzen dute kofradiako kideek. Aurten abuztuaren 17an izango da, elizako arkupeetan. Ez dago menu “sakraturik”, baina ogi-zopa eta garbantzu gisatuak jan ohi dira.
Bazkaria kofradiako kideek prestatzen dute, baina herriko edonor bertaratu daiteke jatera. Hala, bazkari herrikoi bat bilakatzen da kofradeek antolatzen dutena, adin guztietako herritarrak bertaratzen baitira auzokideekin jatera.
Umeek, baina, lehenago jan ohi dute. Zita jendetsua da. Orotara 300 pertsona inguru bertaratzen direla azaldu dute Kofradiako kideek. Zifra handia: Arrankudiagan 900 biztanle inguru bizi direla kontuan hartuta, populazioaren herena bertaratzen dela esan baitaiteke.
Edozein herritarri zabaldua
Kofradiako kideak historikoki gizonezkoak izan diren arren, kofradeek adierazi dute ez dutela inongo arazorik emakumeak onartzeko. “Edozein herritar sartu daiteke”, azpimarratu dute.