Asteburu honetan egingo da Arrankudiaga-Zollon Truke Azoka.
Truke azokak gauza batzuk beste gauza batzuengatik aldatzeko aukera eskainiko du. Baita jabeak ipinitako prezioan erostekoa ere.
“Ekarri behar ez duzuna, behar duzuna eraman” izango da ekimenaren leloa.
“Etxean lekua okupatu baino egiten ez duten traste horiek, erabiltzen ez ditugun jostailu, liburu, musika disko edota CDak, aspaldiko tresna horiek aldatu eta eskaini egun interesatu ahal zaizkizun gauzengatik”, adierazi dute antolatzaileek. 11:30ean hasiko da ekimena eta igande goiz osoa iraungo du.
Gazte Burrunbada
Larunbatean aldiz, Gazte Burrunbada antolatu du Ernaik. Eskualdeko Gazte Egunen antzekoa izango da: “Hau da, bai herriko eta baita eskualdeko gazteak elkartu eta herri giroa bultzatu nahi duen arratsalde eta gauerako egitaraua”.
Ekitaldi ugari prestatu dituzte. 17:00etatik aurrera gazte olinpiadak izango dira. 18:30ak aldera, trikipoteoa egingo dute plaza inguruko tabernetan zehar.
Gauean, aldiz, musika jaialdia egingo dute. 20:30etatik aurrera emango zaio hasiera gauari Aiaraldeko Uluka taldearen kantaldiarekin. Ondoren, Ugaoko Atxurkada eta Nodo taldeek joko dute. Eta, herriko A Gantxo y Kutxillo taldeak. Eta azkenik, Landazuri Bass-Foundation eta DJ Gorka I. izango dira. Kontzertu guztiak Iberlanda futbol zelaiaren aldamenean izango dira.