Ramon Azkue omenduko dute asteburu honetan Arrankudiagan, igandean 80 urte beteko baitira fusilatu zutenetik. EAJko kide garrantzitsua izan zen Azkue, Guda Zibilean Eusko Gudarostea zuzentzea egokitu baitzitzaion. Kuban jaio zen 1898. urtean, baina lotura handia izan zuen Arrankudiagarekin. “Bere ama, Ramona Gorostizaga, herrikoa zen”, azaldu dute Ramon Azkue elkarteko kideek. Hori dela eta, Bilbo eta Arrankudiaga artean aritu zen Eusko Alderdi Jeltzaleko kidea. Herrian zegoenean, gaur egun Batzokia dagoen tokian bizi zen. Hiriburura mugitzen zenean, aldiz, Carton Hotelaren aurrean zegoen etxe batean hartzen zuen ostatu, Elkano kalean.
Zeresan handiko ekintza bat egin zuen Azkuek Arrankudiagan 1931. urtean: Ikurriña jarri zuen udaletxean lehenbiziko aldiz, Jesus Solaunekin batera.
Sei urteko gehiago baino ez zen bizi izan: 1936ko urriaren 15ean fusilatu zuten frankistek Santoñako espetxean, beste 13 lagunekin batera.
Bi eguneko egitaraua
Hori dela eta, hainbat ekintza prestatu dituzte herrian asteburu honetarako. Gaur izango da lehenengo zita, arratsaldeko zazpietan Udaltalde aretoan. Iñaki Anasagasti senatari jeltzaleak hitzaldia eskainiko du, bera baita Azkueren figura ikertu duen pertsonetako bat.
Bihar -larunbata- aldiz, Itxaso Atutxa Bizkaia Buru Batzarreko presidentea bertaratuko da herrira, 12:00etan hasiko den solasaldi batean parte hartzeko. Trikipoteoa egongo da gero, 13:00etan. Amaitzeko, bazkaria egingo da 15:00etan, EAJ-PNVren barne eta herri-kargudunak omentzeko.
EGITARAU OSOA
Urriak 13, ostirala
19:00 // Iñaki Anasagastiren hitzaldia Udaltalde aretoan
Urriak 14, larunbata
12:00 // Itxaso Atutxarekin solasean
13:00 // Trikipoteoa
15:00 // EAJ-PNVren barne kargudunak eta Herri Kargudunak omentzeko bazkaria