.jpg)
Prentsa oharra plazaratu dute Arrankudiaga-Zolloko EAJko kideek iragan larunbat goizean Batzokian agertutako margoketak salatzeko. “Ezuzteko handia” jasotzeaz gain, “lotsa eta pena” sentitu zituztela aipatu dute jeltzaleek. “Ezustekoa, lehenengo aldia baita Arrankudiagako Batzokiak honelako eraso bat jasotzen duela eta pena eta lotsa, berriz, ulertezina delako edozein egoera salatzeko alderdi politikoen egoitzen kontra erasotu behar izatea”. Larriki gaixo dagoen Ibon Iparragirre presoaren askatasuna exijitzen zuten margoketek.
Preso dauden pertsonen eskubideen defentsa
Alderdi jeltzaleko kideek azpimarratu dute preso dauden pertsona guztiek “legeak bermatu beharko lituzkeen osasun zerbitzuak jasotzeko eskubidea izan beharko lutekeela eta are gehiago hiltzeko zorian dagoen preso batek”. Horregatik, adierazi dute ezin dutela margoketa onartu, “ez baitauka inolako zentzurik gizarte honetan ematen diren gaitz guztiak EAJri leporatzea”.
EAJko kideek azaldu dute kartzelen konpetentzia ez dagoela Eusko Jaurlaritzaren esku eta, beraz, “ezer gutxi” egin dezaketela gai horren inguruan. “Badirudi eraso horiek gauzatzen dituztenen helburu bakarra presoen egoera salatu beharrean, haiek izan ditzaketen arrazoi ezberdinengatik EAJ erasotzea dela soilik”. Horregatik, hurrengo batean pintadak "euren etxeko hormetan" egiteko gonbita luzatu diete margoketen egileei.