aiaraldea.eus

Orientazio proba egingo du Matxinkortak Arrankudiagako festetan

Erabiltzailearen aurpegia Izar Mendiguren Cosgaya   Kirola  Arrankudiaga-Zollo

Abuztuaren 15ean izango da proba, 11:00etatik aurrera. Bakarka edo bikoteka hartu ahalko da parte.

Orientazio proba egingo du Matxinkortak Arrankudiagako festetan
Matxinkortako kideak. / Aiaraldea.eus | Ikusi handiago | Argazki originala

Arrankudiaga-Zolloko Matxinkorta Mendi taldeak ekintza berria plazaratuko du aurtengo festetan: orientazio proba. Abuztuaren 15ean, asteazkenean, egingo dute; 11:00etan. Izen-ematea egunean bertan irekiko da, 10:30ean plazan.

Bi maila izango ditu norgehiagokak. Ibilbide horia lau kilometrokoa izango da, 90 metroko desnibelarekin. 15 urte bitartekoei zuzendutako jarduera da honakoa. Gazte eta helduek -hots, 16 urtetik gorakoek- 8 kilometroko zirkuitua osatu beharko dute, 200 metroko desnibelarekin. Bakarka edo binaka arituko dira kirolariak. "Sariak lehen hiru sailkatuentzat egongo dira", adierazi dute antolatzaileek.

Kirol proba baino, jolasa
"Askotan herriko txoko eta paraje asko gugandik hurbil egon arren ez ditugu ezagutzen, beraz, antolatu dugun orientazio frogaren helburu nagusia, herriko jendeak Arrankudiagako hainbat leku ezagutzea da", azaldu dute antolatzaileek. Jolas ikutua eman nahi diote ekintzari: "Berez, orientazio lasterketa deitu arren, altxorraren bilaren antzeko joko herrikoi bat izango da. Partehartzaileei mapa bat emango zaie eta hauek mapa hori jarraituz pistak aurkitu beharko dituzte ibilbide bat burutu arte".

Herriko auzoak ezagutzeko aukera
Zein bazter zeharkatuko ditu ibilbideak? Herrigunea izango du ardatz, Matxinkortakoen esanetan: "Prestatu ditugun ibilbideek batez ere herriko Elexalde auzoa eta bere inguruko Arrankudiagako auzoak zeharkatuko dituzte".

Partaideek ez dute ezer berezirik eraman beharko, "arropa eta oinetako erosoak" baino ez. "Edozein pertsonak egiteko moduko bi ibilbide diseinatu ditugu".

 Matxinkorta Mendi Taldea erabiltzailearen argazkia.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa