Bizkaiko Dia supermerkatuetan mobilizatzeari ekin diote ELAk eta LABek. Atxetako dendan ere izan du eragina grebak, atzo eta gaur protestan aritu baitira langileak. Kaleratzeak salatzea da helburua. Hala, hurbildu diren herritarrei eskuorriak banatu dizkiete. "Egoera azaldu ostean, jende gehiena ez da erosketak egitera sartu. Horniketa kamioiak ere egin du atzera", adierazi diote Aiaraldea hedabideari grebalariek. Bizkaian 300 behargin zeuden deituak protestara, eta erdiek egin dute bat grebarekin.
Euskal ordezkaritzarik ez negoziaketa mahaian
Otsailaren 8an jakin zuten sindikatuek Espainiar Estatuan Enplegu Erregulazio Espedientearen prozedura abiatu duela enpresak. "Prentsa eta langileoi aldi berean jakinarazi zitzaigun", salatu dute. 15 eguneko epean negoziazio mahaia eratzeko konpromisoa hartu zuen zuzendaritzak orduan.
Alabaina, Euskal Herrian ordezkaritza nagusia izan arren, ez dute euskal sindikatuengana jo. Hori dela eta, greba deitu dute ELAk eta LABek gehiengoa duten lurraldeetan -hots, Bizkaian eta Gipuzkoan- otsailaren 27an eta 28an. Sindikatu horiek negoziazio fasean ordezkaririk lortu ezean, martxoaren 5ean greba egingo dute berriro, "eta martxoaren 11tik aurrera greba mugagabea hasiko dugu DIA supermerkatuetako enpleguaren eta lan baldintzen alde".
_content.jpeg)
Euskal sindikatuen aburuz, langileek ez dute ardurarik taldearen akzio eta finantzek duten egoerarekiko: "Azken hilean mobilizazio eta greba ugari egin dugu, prekarietatea amaitzea eta plantilla handitzea eskatuz. DIAren etorkizuna bermatzeko kudeaketa eta zerbitzu hobeak behar dira. Madrildik sekula ez da ezer onik etorri. Hemen analiza eta negozia daitezela krisi honetara eraman duten arrazoiak, irtenbiderik egokiena erabaki dadin".
Egoera bideratzeko, Espainiako DIAko zuzendaritzarekin jarri dira sindikatuak herremanetan: "Mahai horretan parte hartzeko eskubidea zor zaigula jakinarazi diegu LAB, ELA eta Galizako CIG eta Aragoiko OSTA sindikatuok FETICO, CCOO eta UGT sindikatuei". Oraindik, ordea, ez dute erantzunik jaso. "Negoziazio mahaia gure ordezkaririk gabe eratzen bada, antidemokratikoa eta legez kanpokoa izango da", azpimarratu dute. Aldaketarik ezean, beraz, martxoaren 5ean emango diote segida grebari.