Gogotsu ekingo diote ikasturte berriari Arrankudiagako Txondor Gaztetxean. Dantza ikastaroa abiatuko dute asteazkenean.
Ordubeteko saioak egingo dituzte astero, ekainera arte. “Astelehenetan edo asteazkenetan egingo ditugu, arratsaldeko zazpietan (irakaslearen lan ordutegiaren arabera)”, azaldu dute Arrankudiaga eta Zolloko Gazte Asanbladako kideek, “hilabete hasieran adostuko ditugu datak. “Talde irekia” dela nabarmendu dute. “Beraz herriko gazteak eta helduak animatzen ditugu parte hartzera!”.
Ikastaroaren egiten duten hirugarren ikasturtea izango da honakoa. Iaz egin zuten lehenbiziko aldiz. “2018an herriko zenbait gazteren artean komentatu genuen euskal dantzak ikasi nahi genituela eta herriko gainontzeko pertsonei ere ikasteko aukera eman nahi geniela”, kontatu dute gazte asanbladako kideek. Pentsatu eta egin. 2018ko otsailean ekin zieten klaseei. Hasieran 6-7 gazte ziren, baina gaur egun 15 pertsona daude taldean eta “sortu den giroa oso polita da”, antolatzaileen esanetan.
Ekintza gehiago
“Herriko gazteak aktibatzea”. Hori da asanbladan ikasturte berrirako zehaztu duten helburua. Hainbat egitasmo egingo dituzte horretarako.
“Orain arte egindako ekintzekin jarraituko dugu, kontzertuak kasu”, zehaztu dute, “hilabetean behin zinema egiten dugu gaztetxean eta neguko oporretan ere umeentzako hainbat jarduera antolatzen ditugu, eta jarraituko dugu”.
Hitzaldiak antolatzea ere aurreikusi dute, “gazteei eta gainontzeko herritarrei begira”. Horrez gain, gaztetxeko taberna zabalduko dute ostiral arratsaldeetan eta igande goizetan, “aurreko ikasturtean bezala”.