Hainbat ekimen jarri ditu abian Arrankudiaga-Zolloko Udalak COVID-19 birusak sortutako ondorio ekonomiko eta sozialei aurre egiteko, “herritarrek pairatu ahal dituzten estutasun ekonomikoak arintze aldera”.
Alde batetik, aholkularitza legala eskainiko du tokiko erakundeak, “osasun alarmaren ondorioz ohiko etxebizitzaren hipoteka ordaintzeko edo ohiko etxebizitza alokatzeko zailtasun ekonomikoak dituzten herriko biztanleentzat”. 94 648 17 12 telefonora deitu beharko dute interesdunek, euren datuak emateko. Ondoren, aholkulari bat jarriko da eurekin harremanetan.
Bestetik, zerga eta tasen arloan laguntzak emango ditu Udalak. Diru laguntzak emango dituzte zarama, saneamendua, estolderia eta ur horniduraren tasak ordaintzeko arazo ekonomikoak dituzten herritarrei. Tokiko erakundeak aukera emango du 1.500 eurotik gorako edozein zerga epeka ordaintzeko, “12 hilabetetan interes barik eta hortik aurrera interes legalarekin”. Gainera, % 2,5eko hobaria aplikatuko zaie ibilgailuen zergan ordainketa helbideratua dutenei.
Obren tasetan ere hainbat hobari ezarri dituzte, "energia arloan, irisgarritasuna, fatxada eta estalpen birgaitze obretan".
Horrez gain, Udalak jakinarazi du ez diela kuotarik kobratu tabernei alarma egoerak iraun duen bitartean.