Lankidetza-hitzarmena sinatu du Arrankudiaga eta Zolloko Udalak Kamaraka Eskupilota Kirol Elkartearekin. Hitzarmen horren bidez, tokiko erakundeak elkartearen esku utziko du Elexaldeko frontoia, “bere jarduerak egin ditzan”. Horrez gain, udalak 5.000 euroko diru-laguntza emango dio elkarteari ekintza horiek garatzeko.
Talde aktiboa da Kamaraka. “Urrian hasten dira txapelketak”, azaldu du Jon Txomin Arandia, elkarteko presidenteak. 20 pilotari inguru daude taldean. “Gehienak mutilak dira, baina badaude baita neska ugari ere”.
Astean bi aldiz entrenatzen dute frontoian, astelehenen eta asteazkenetan. Horrez gain, “betidanik” izan dute herriarekin lotura estua, Arandiaren hitzetan. “Neguko jaietan pilota jaialdia antolatzen dugu, eta herriko jaietan ere bi ekimen egiten ditugu: eskola pilota txapelketa Andra Mari egunean eta afizionatuen norgehiagoka Berakatz Egunean”.
Orokorrean, pilotarekiko zaletasuna “mantendu” egin dela aipatu du Kamarakako presidenteak, “futbolak askoz gehiago erakartzen duen arren”.