Udazkenean zen ospatzekoa Arrankudiaga eta Zolloko Trailaren VIII. edizioa, baina bertan behera utzi dute ekimena. Antolatzaileen esanetan, COVID-19ak sortutako egoera “nahiko berezi eta aldakorra” da. “Lan asko ditugu egiteke, eta gertatuko denarekiko ezjakintasunak bultzatu gaitu erabaki hori hartzera”, azaldu dute.
Hala ere, datorren urtean egitasmoari berriro heltzeko prestutasuna erakutsi dute. Izan ere, “gutxienez” X. ediziora heltzea dute helburu, eta orduan “zer edo zer berezia” egitea.
Positiboki baloratu dute orain arte eginiko ibilbidea: “Zortzi edizio daramatzagu jada eta nahiko talde homogeneoa mantentzea lortu dugu,hasieratik pertsona berdinak gabiltza taldean”. Sortutako lan-dinamikaren “oso gustura” daudela nabarmendu dute, eta herritarren inplikazioa goraipatu: “atzean beti dago 60-70 laguneko talde bat lan egiteko prest, eta sekulako babesa ematen digu horrek”.
Lasterketa bat baino gehiago
Ekimenak izandako harrerarekin ere pozik daude. Beti izan dituzte 150 parte hartzaile baino gehiago, eta azken edizioetan 200 inguru izan dira. “Umeen lasterketa gehitu behar zaio hori, 60 haur inguru aritzen baitira bertan”.
Izan ere, lasterketa hutsetik harago doa Arrankudiaga eta Zolloko Traila. “Beti antolatu ditugu ekimen paraleloak: herri kirolak, erronkak edota musika emanaldiak”. Antolatzaileen aburuz, “lasterketa herrikoia” egitea izan dute xede nagusi, “prezio sinboliko batekin, tratu oneko lasterketa bat, hurbila”.