Udaz blai

Guda Zibileko aztarnen atzetik

Arrankudiagako lubaki bat, Guda Zibila amaitu eta gutxira eginiko argazki batean. / Argazkiak: Saratxo Aldama Guaresti eta Bizkaiko Foru Aldundia

Lanketa handia egin dute Arrankudiaga eta Zollon azken urteetan memoria historikoaren berreskurapenari begira. Txomin Egiluz eta Markel Iturrizar bizilagunek hainbat ikerketa, hitzaldi eta ekimen egin dituzte udalerrian Guda zibilean gertatutakoa argitara ekartzeko. Zonaldean Kondor Legioak jaurtitako bonben nondik norakoak ikertu dituzte, besteak beste. Horrez gain, gerraren aztarnak bilatu eta berreskuratu dituzte.

Burdin Hesitik txangoa

Gauzak hala, ibilbide politak egin daitezke udalerrian barrena, Guda Zibilaren arrastoak ezagutzeko. 2018. urtean indusketak egin ziren eta metrailadore-hobi bat berreskuratu zuten.

Ondoren, hainbat seinale jarri zituen udalak, Gogora institutuaren diru-laguntza baliatuta. Arrankudiagako plazan dago lehen kartela, Garondora joateko bidea erakusten duena.

Ikurrak jarraituz gero, ibilbide polita osatu daiteke historia hurbilean barrena. Zabaletik, Albitzarriko metrailadore hobitik, Altzagatik, Madalenatik eta Mugarriluzetik igarotzen da bidea. “Albitzarrin badaude beste bi metrailadore hobi, apur bat ezkutatuta”, azaldu du Egiluzek, “Altzagako aldapa igo bezain laster beste bat topatu daiteke”.

Madalenako zonaldea ere jarri du balioan historiazaleak. “Gaur egun aterpe bat dago bertan, baina XVIII. mendean eraitsitako ermita baten arrastoak ere ikus daitezke. Handik 300 metrora Guda Zibileko beste metrailadore- hobi bat topatu daiteke. Bertatik aukera dago Goikoganera igo eta Kastillozarreraino jarraitzeko, Burdin Hesiaren Laudioko zatitik”.

Zolloko bidea

Zollon ere beste bide polit bat dagoela gehitu du Egiluzek. “Zolloko udaletxetik errepidea jarraituta, Mengorio auzora joan behar da. Bertatik Ollargan aldera jo behar da gero. Hiru koba daude, gerrako materiala gordetzeko baliatzen zirenak. Bi metrailadore-hobi ere ikusi daitezke bidean. Gotorleku bat ere ikus daiteke, oso egoera onean ez dagoen arren”.

Historiazaleak argitu duenez, ez da kasualitatea Zollon horrenbeste aztarna topatzea. “Zolloko urtegia babestera bideratuak zeuden, Bilbon denbora luzez setiatzen bazuten ur-hornikuntza bermatu ahal izateko”.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide