Atzo Arrankudiaga-Zolloko Udalak adostu zuen hiri hondakin izendatzea Bakiolan abandonaturik dagoen auto bat. Tokiko erakundeak prozedura hori baliatuko du hemendik aurrera jendeak kalean lagatzen dituen ibilgailuekin.
"Bakiolako kasuan, auzokideek hainbat aldiz salatu dute Dian 6 markako auto zahar bat dagoela kalean aspaldi. Autoa erdoildu da eta dena zikintzen du. Ibilgailuaren jabeak argudiatzen du toki hori pribatua dela eta ez duela kenduko. Lekuaren jabegoa oso lan nekeza eta luzea denez, hiri hondakintzat joko dugu autoa, behingoz kentzeko" azaldu zuen Txutxi Ariznabarreta alkateak.
Zollon ere arazoa
Zollon antzeko egoera dauka udalak aurrean. Izan ere, udan auto bati zepoa jarri zion Ertzaintzak eta geroztik han dago. "Ertzaintzari eskatu diogu bere depositora eramatea eta poliziak esan digu ezin duela egin, autoak ez baitu ITVrik. Jabearekin ere harremanetan jarri gara, tokitik kentzeko, baina argudiatu du Ertzaintzak ez diola zepoa kendu nahi" argitu zuen alkateak.
Gauzak horrela, udalak adierazi du nazkatu dela batzuekin eta besteekin hitz egiteaz eta laster auto hori ere izendatuko dute hiri hondakina. Prozesua ez da erraza ezta motza ere, baina inplikatuen artean inork erantzukizunik hartzen ez duela ikusita, tokiko erakundeak aipatutako bidea jarraituko du.
Txutxi Ariznabarretak erantsi zuen udalak ezin duela bere bitartekoekin auto horiek bere gain hartu: "Ez dugu horrelako hondakinak uzteko tokirik". Halaber, iradoki zuen lan garestia izan daitekeela: "Guk garabia kontratatuko dugu autoa kentzeko, eta gero prozesua abiatuko dugu jabeak ordaindu ditzan kostuak, baina ikusiko dugu egiten duen".