Hautaketa prozesua abiatu du Arrankudiaga eta Zolloko Udalak, Zolloko eskola zaharreko eraikinean dagoen udal-etxebizitza alokairu-erregimenean esleitzeko. Urtarrilaren 25era arte egongo da eskaera aurkezteko epea. Udal bulegoetan egin beharko da tramitea.
Etxebizitzak 56 metro koadro ditu, zonalde hauetan banatuta: egongela bat, hiru logela, sukaldea eta komun bat.
Interesdunek hainbat baldintza bete beharko dituzte: etxebizitzarik ez izatea eta urtean 3.000 eta 45.000 euro arteko diru sarrera gordinak eskuratzea.
Tokiko erakundeak zehaztu duenez, lehentasuna emango zaie ondorengo auzoetako bizilagunei: Aspiuntza, Etxebarri, Orueta, Torre Beaskoetxea, Ustara eta Zollo Elexalde. “Auzo horietan erroldatutako pertsonen eskaerarik ez badago, Arrankudiagako gainerako zonaldeetan erroldatutako pertsonak eta Arrankudiagako eta Zolloko udalerritik kanpo erroldatutako pertsonak sartu ahal izango dira. Azken kasu horretan, lehen mailako odol ahaidetasuna izan beharko dute Zolloko auzo batean erroldatutako pertsonekin”.
Maizterrak 140 eta 400 euro artean ordainduko ditu etxebizitza erabiltzeagatik. Diru-sarrerak eta bizikidetza unitatearen kide kopuruak hartuko dira kontuan kanona zehazterako orduan.