Iazko otsailean proposatu zuen Zolloko Batzarrak udalerriaren izena berritzea. Zehazki, "Arrankudiaga eta Zollo" deitzea da nahi dutena, eta hala adierazi zioten tokiko erakundeari zein Bizkaiko Foru Aldundiari.
Txutxi Ariznabarreta alkateak Aiaraldea Komunikabideari adierazi dionez, "azken pausoan dago uneotan prozesua. Izen eskaeraren argipena eskatu digute".
Udalbatzaren oniritzia jaso zuen zollotarren eskakizunak, eta Eusko Ikaskuntzaren txostenaren onarpena ere bai. Alabaina, Euskaltzaindiak gidoia erabiltzea lehenesten du Euskal Herriko udalerrien izen elkarketetan, Markiña-Xemein bezala.
Bizkaiko Foru Aldundiaren babesa jasota, Batzar Nagusietan bozkatu behar zen udalerriaren izen moldaketa. "Onarpenerako edo bozketarako azken egunean, dagokion batzordeak atzera bota zuen. Izen zehatza eskatu digute, baina Euskaltzaindiaren irizpideak kontuan hartuta", zehaztu du gobernuburuak.
"Arrankudiaga-Zollo da aukera bat, baina Zolloko batzarrean jendeak 'eta' jartzea erabaki zuen, bi herriak bereizi baina udal bakarra mantentzea", erantsi du. Ondorioz, Zolloko Batzarrean berriro egin beharko dute kontrastea. Horrenbestez, "airean dago oraindik erabakia".
Tramitazioa iazko otsailean hasi zen, "baina hilabeteak igaro ditu Diputazioan geldi". Zolloko Batzarrak egin zuen lehenbiziko eskaera, herriko batzarrak hala adierazita.