Arrankudiaga-Zolloko Udalak kanpaina abiatu du liztor asiarraren aurka eta horretarako herritarren laguntza eskatu du. Zehazki, asteazkenean espezie inbaditzaile horri buruzko hitzaldia antolatu zuen, Bizkaiko Erlezainen Elkartearekin.
Solasaldi horretan liztor mota horren informazio ugari partekatu zuen Aitziber Mendibil Zeberioko erlezainak. Halaber, eta udalak finantzatuta, tranpak,edukiontziak zein produktu likidoak, banatu zituzten liztorrak harrapatzeko.
Txutxi Ariznabarreta alkateak parte hartu zuen ekimenean eta azaldu du bertaratu ziren Arrankudiaga zein Zolloko 14 herritarrek tranpak eraman zituztela. Dena den, konpromisoa ez da soilik liztorrak akabatzea. "15 egunero herritar bakoitza harremanetan jarri behar da kanpainako koordinatzailearekin eta jakinarazi behar dio zenbat liztor erori diren tranpetan. Horri esker, ikertuko dute zein den animaliaren presentzia auzune bakoitzean eta noiz areagotzen den", adierazi du Ariznabarretak.
Udalburuak gaineratu du interesdunek izena eman dezaketela oraindik kanpainan. Horretarako, udaletxera jo behar dute eta tranpak zein produktuak eskatu ditzakete.