Arrankudiaga-Zollo eta Arakaldoko ur-hondakinen kudeaketa arazoei irtenbidea emateko konpromisoa berretsi du EH Bilduk

Idurre Bideguren senataria Txutxi Ariznabarreta eta Jabi Asurmendi alkateekin batzartu da. / Aiaraldea.eus

Arrankudiaga-Zolloko eta Arakaldoko alkateekin batzartu dira gaur Idurre Bideguren senataria, Mikel Otero legebiltzarkidea eta Zigor Isuskiza Bizkaiko foru diputatua, bi udalerriek bizi duten hondakin-uren kudeaketa arazoa bertatik bertara ezagutzeko. EH Bilduko ordezkaritzak egoera bideratzeko konpormisoa adierazi die bi alkateei.

Arrankudiaga-Zollo eta Arakaldo, ur-saneamenduari dagokionez, puntu ilun bat direla ohartarazi dute bi udalerrietako alkateek. Aiaraldeko urak bilduko dituen Basurbeko araztegia Araba eta Bizkaiko mugan eraikiko dute. Aldi berean, Galindoko araztegira ur-zikinak bideratzen dituzten kolektoreak Ugaora arte iristen dira bakarrik. Horren ondorioz, ur zikinak Nerbioi ibaira isurtzen jarraitu beharko dute Arrankudiaga-Zollok eta Arakaldok.

"Izugarrizko presioa jasaten dugu bi udalok URA agentziaren eta bestelako estamentuen aldetik ur-zikinen isuria dela eta; baina hori konpontzea ez dago gure esku, ezin ditugu horrelako inbertsioak egin"

"Izugarrizko presioa jasaten dugu bi udalok URA agentziaren eta bestelako estamentuen aldetik ur-zikinen isuria dela eta" azaldu du Txutxi Ariznabarreta. Bi udalek, arazoa sortu ez, "sufritu" egiten dutela adierazi du Arrankudiaga-Zolloko alkateak. "Hori konpontzea ez dago gure esku, ez gara iristen konponbideak eskatzen duen diru inbertsiora. Bi milioi euroko aurrekontua ez duen udalerria da gurea, nola finantzatuko dugu hainbeste milioi euroko kostua duen proiektua?", nabarmendu du Ariznabarretak. 

Gaineratu duenez, Arrankudiaga eta Arakaldo artean hiru dira ur-zikinak kolektoreetara bideratzen ez dituzten industriaguneak: Bakiola, Arbide eta Ugarriza uharteko poligonoa. "Bakiolako poligono industrialak 70 pabilioi ditu, mugimendu handia dago. Onartezina da ur zikinak Nerbioi ibaira isurtzea, kolektoreak hain kilometro eskasetara dituztenean". Bi udalerriak kexu dira inork ez diolako gaiari heldu nahi, eta frustrazio egoera batean daudela azpimarratu dute. Adierazi dutenez, ate asko jo dituzte egoera bideratzeko asmoz; URA agentzian, Bizkaiko Diputazioan edota Madrileko Gobernuan, adibidez. Baina salatu dute inork ez duela egoera bideratu nahi.

EH Bilduren konpromisoa

Egoera bideratzeko asmoz, Txutxi Ariznabarreta eta Jabi Asurmendi alkateekin batzartu da gaur EH Bilduko ordezkaritza bat. Idurre Bideguren senataria buru zela, bertan egon dira ere Mikel Otero legebiltzarkidea eta Zigor Isuskiza Bizkaiko foru diputatua. Bidegurenek koalizioaren konpromisoa berretsi du, eta ziurtatu dute gaia landuko dutela hainbat erakundetan, Nerbioiko saneamendu arazoei irtenbidea emateko:

Hain zuzen ere, Bidegurenek azaldu duenez, irtenbide teknikoa idatzia dago honezkero, eta finantziazioa da falta den gauza bakarra. "Ezin dugu egoera hau konponbide gabe utzi finantziazio arazo batengatik, ingurumena kaltetzen duen arazo larria da hemen daukaguna" azpimarratu du senatariak.

Arrankudiaga-Zollo Bizkaiko ur-partzuergoan integratzeko proiektuan dago jasoa ur zikinen isurketak eteteko proiektua. Arrankudiaga-Zollok Ugaoko kolektoreetara ponpatuko lituzke ur zikinak. Arakaldok, aldiz, ibaian gora dauden Arrankudiagako bi auzorekin batera, Basurbeko araztegira ponpatuko lituzke ur zikinak. "Zenbait erakundetan saiatuko gara presionatzen zonalde honetako saneamenduari irtenbide bat emateko lehen bai lehen".

Ingurumena Arrankudiaga-Zollo

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide