Basakoetxeko baselizan elkartuko dira datorren uztailaren 10ean Arrankudiaga eta Zolloko bizilagunak, ohiko erromeria ospatzeko. 10:00etan piztuko dute jai-eguneko lehenengo suziria, mezari bide emateko. 12:00etan, aldiz, haurrentzako ohe elastikoak irekiko dituzte.
Paella eta patata tortilla lehiaketa
Pandemiak bi urtez eten du herrian urte luzez antolatu den ospakizuna, baina aurtengo edizioa berritasunekin dator: patata tortilla eta paella txapelketak antolatu ditu Arrankudiagako Gizarte Etxeak.
Paella lehiaketarako izen ematea 12:30ean irekiko dute, eta 14:00etan entregatu beharko dira lapikoak. "Gutxienez zortzi lagunentzako lapikoak izan beharko dira, eta zaporea arrozaren puntua eta itxura baloratuko dira", azaldu dute antolatzaileek.
Herriko haurrek ere aukera izango dute patata tortilla txapelketan parte hartzeko. Euren kasuan ere 12:30ean izango da izen ematea, eta tortillen entrega 14:00etan egin beharko da.
Epai-mahaiak irabazleak ebatzi ostean, herri bazkaria egingo dute. Antolakuntzak mahaiak eta aulkiak jarriko ditu eskura, "kozinatutakoa elkarrekin disfrutatzeko".
15:30etan, aldiz, erromeria hasiko da, eta 18:00etan agurtuko dute jai-giroa.