Uztailaren hasieratik etenda dago mediku zerbitzua Arrankudiaga-Zolloko kontsultategian. Hala jakinarazi du Udalak, eta adierazpen instituzionala plazaratu du Osakidetzak hartutako erabakia salatzeko.
Tokiko erakundeak nabarmendu du erabaki horren ondorioz bizilagunek Ugaora jo behar dutela arreta jasotzera, eta horrek “eragozpen nabarmenak” sortzen dizkiela mediku beharra duten herritar eta familiei, udalerriko bizitza kalitatea “atzerapauso” bat eraginez.
“Azken bi urteotan, horrelako zerbitzu murrizketak izan direnean, pandemiaren eraginak behartuta hartutako neurriak izan direla esan zaigu”, azaldu dute adierazpen instituzionalean, “horregatik, orain, pandemiaren eragin zuzena gaindituta dagoela esaten denean, ez dugu ulertzen zerbitzu murrizketa hau”.
Era berean, “beldurra” ere adierazi du tokiko erakundeak, horrelako murrizketak ohiko bilakatzeak kontsultategia “behin betiko ixteko bidea” izan daitezkeela iritzita. Gauzak hala, azpiegitura berriro irekitzea eskatu dio Udalak Eusko Jaurlaritzako Osasun Sailari, “osasun sistema publikoak eskaintzen dituen zerbitzuak udalerrian urte osoan zehar bermatzeko”.