Arrankudiaga-Zolloko Matxinkorta mendi taldeak aurkeztu du dagoeneko iraileko egitaraua. Hain zuzen, Pirinioetara joango dira hirugarren asteburuan. Oraingoan, Posets gailurra aukeratu du kirol elkarteak, eta irailaren 17an zein 18an egingo dute ibilaldia.
Larunbatean abiatuko dira Arrankudiagako plazatik, 8:00etan. 13:00etan aurreikusi dute iristea Benasquera (Huesca, Espainia), eta bertan bazkalduko dute, "bakoitzak etxetik eramandakoa". Zehaztu dutenez, 18:00etan ailegatuko dira Angel Orus aterpetxera, eta elkarrekin afalduko dute han. Modu horretan, igandean ekingo diote Posets gailurrerako zeharkaldiari.
Aurreratu dutenez, igandean 6:00etan irtengo dira lo lekutik, 10:00etan tontorrean egoteko xedez. Modu horretan, 17:00etan berriz irteera puntura iristea espero dute; ondoren, Arrankudiagara itzultzeko.
Izena emateko epea irailaren 10ean bukatuko da. Matxinkortako bazkideak direnek 65€ ordaindu beharko dituzte, eta besteek 80€. Deialdia irekia bada ere, 12 pertsonako muga jarri dute ekintzaz gozatzeko. Interesdunek matxinkorta@gmail.com helbidera bidali beharko dute mezua, edota Facebookeko kontura.