Euskal ezkontza bat antolatu nahi dute Arrankudiaga-Zollon, eta bihar egingo dute ekimena prestatzen hasteko lehen bilera, 19:00etan Txondor Gaztetxean. Gazte Asanbladak proposatu du egitasmoa, baina udalerri osora zabaldu nahi dute proposamena. Gauzak hala, herritar orori luzatu diote ekimenean parte hartzeko gonbita.
Euskal ezkontza tradizional baten irudikapena modu herritarrean egitean datza, hain zuzen, 'Euskal ezkontza' ekimena. Euskal Herriko hainbat tokitan egiten da, eta Aiaraldean ere hainbat herritan egin da azken hamarkadan, Amurrio, Orozko eta Urduñan kasu.
Sagardotegira irteera
Beste ekimen bat ere dute esku artean Txondor Gaztetxeko kideek. Sagardotegira irteera antolatu dute martxoaren 4rako. Irteera 12:00etan izango da Herriko plazatik eta itzulera 1:30ean, Hernanitik. Otsailaren 15era arte egongo da izena emateko epea eta telefono zenbaki honetara deitu behar da horretarako: 671 341 881 (Olatz). Ohartarazi dutenez, autobusa beteko balitz, herrikoek izango lukete lehentasuna.