Atzo eguerdian izan zuen Arrankudiaga-Zolloko EH Bilduk hauteskunde kanpainako zita nagusia, Arrankudiagako plazan. Musikarekin hasi zuten ekitaldia, udalerriko hainbat musikariren eskutik. Ondoren, Txutxi Ariznabarretak hartu zuen hitza, gainontzeko zerrendakideak atzean zituela.
Koalizioaren alkategaiak amaitzear dagoen legealdia errepasatu zuen lehenbizi. Nabarmendu zuen ez dela garai erraza izan, pandemiaren, erregaien krisiaren zein krisi ekonomikoaren ondorioz. “Guzti horrek, egia esan, kristoren aberia egin zigun, eta gauza batzuk atera dira, parte-hartze plana, adibidez; nahiz eta legealdi amaieran ekin diogun parte hartze prozesu batzuk garatzeari”, aitortu zuen zerrendaburuak.
Oxinbururen finantzaketa hizpide
Jarraian, Oxinbururen egitasmoaz mintzatu zen Ariznabarreta. Proiektua atzeratu den arren, egungo alkateak iragarri zuen “aurreikusitakoa baino lehenago” amaituko dela azkenean, “hasieran bi fasetan aurreikusita zegoelako eta fase bakarrean egingo delako azkenean”.
Kultur espazio berri horren finantzaketa ere izan zuen hizpide: “Batzuk esan dute Oxinbururen proiektua salbatu egin dugula dirulaguntzei esker. Ba, noski baietz, baina gure kasuan dirulaguntzak ez dira zerutik erortzen. Proiektuak aurrera ateratzeko alkandora izerditu behar da”.
Horri lotuta, alkategaiak nabarmendu zuen Europako funtsen deialdira 1.000 proiektu inguru aurkeztu zirela eta Oxinbururena 13. postuan geratu zela. Gainera, gogorarazi zuen udaletxeko idazkari-interbentorea hainbat asteburutan joan zela Madrilera, funtsak kudeatzen ikasteko saio batzuetara. Bide batez, aukera hori baliatu zuen Ariznabarretak Udaleko langile guztiei eskerrak emateko, euretaz “harro” dagoela eta legealdian zehar “lan-dinamika ederra” sortu dela goraipatuta.
Alkatearen soldata eza
Ondoren, bestelako gai bat ere jorratu zuen Ariznabarretak: alkatearen soldata eza. “Nire belarrira iritsi dira komentarioak, diotenak zerbait jasotzen dudala nahitaez, udaletxean egunero nagoela kontuan hartuta”. Horregatik, Ariznabarretak ziurtatu zuen ez berak ez beste zinegotziek ez dutela inoiz soldata edo dietarik kobratu, eta autoko gasolinaren dirua ere bere poltsikotik ateratzen dela. “Zergatik egiten dugu lanorduan? Ba sudur puntan jartzen zaigulako, militantzia eta konpromisoagatik, askoz zoriontsuagoak garelako horrela”.
Datozen lau urteetarako dituzten proiektuak ere aletu zituen zerrendaburuak, baina baita erronka edota mehatxuak ere, ur saneamendua, mugikortasuna edota Eusko Jaurlaritzak inguruko mendietan planteatutako parke eolikoak kasu.