Arrankudiaga-Zolloko Udalak dekretua argitaratu zuen atzo Red Eléctrica de España enpresak abiatu dituen obrak eten ditzan Ganekogortan. Konpainiak goi tentsioko azpiegitura bat berritu nahi du eta horretarako menditik gertu dagoen bidea zabaldu du.
Udal zerbitzuak uztailaren 18an eta 19an konturatu ziren Elecnor -hau da, REEk kontratatuko konpainia- makinak igotzen ari zela eta lurrak mugitzeari ekin ziola. Ostegunean, behin obrak hasita, Elecnorrek berak eskatu zion tokiko erakundeari hori egiteko baimena.
Maiatzean hasitako prozesua
Edonola ere, afera maiatzaren 9an abiatu zen. Egun horretan Red Eléctrica de Españak baimena eskatu zion Arrankudiaga-Zolloko Udalari Ganekogortako zenbait bide zabaltzeko -4 metroko zabalera izateko- eta beste eremu bat lautzeko, garabiak gainean jartzeko.
Udalak astebete beranduago erantzun zion konpainiari eta adierazi zizkion lanen proiektu xehatua, aurrekontua eta dagozkion inprimakiak igorri behar zizkiola. Ordea, tokiko erakundeak ez du informazio jaso.
Legez kanpoko obrak
Udalak azaldu du dekretuan Elecnorrek Red Eléctrica de Españarentzat hasi dituen lanek hirigintza baimenak behar dituela eta ez dituela eskuratu. Ondorioz, legez kanpoko obrak egiten ari dira.
Hori dela eta, Txutxi Ariznabarreta alkateak exijitu die lanak bertan behera utz ditzaten berehala eta gogoratu die agindua beteko ez balute, zigorra ezarriko dietela hilero: aurrekontuaren %10ekoa edota 600 eurokoa. Gainera, azpimarratu dute desobedientzia delitua egin dezaketela eta Udalak fiskaltzara joko duela.
Azkenik, tokiko erakundeak hilabetea eman die enpresei beharrezkoa den dokumentazioa aurkezteko lanak legeztatu ditzan.