"Renfe aldiriak ez gaitu hurbiltzen" lemapean dozenaka lagun mobilizatu ziren ostiralean Bilboko Plaza Biribilean, Bizkaiko tren geltokietako irisgarritasuna exijitzeko. Fekoor elkarteak deitu zuen mobilizazioa, Gutxitasun Fisikoa edo Organikoa duten Pertsonen Bizkaiko Federazio Koordinatzaileak.
Ostiralean egindako elkarretaratzean salatu zuten Bizkaiko 44 tren geltokietatik 16 baino ez direla irisgarriak. "Mugikortasun-, komunikazio-, ikusmen- edo entzumen-arazoak dituzten 10.000 pertsonak baino gehiagok ezin izan dute eta epe laburrean ezin izango dute RENFE Aldiriak erabili lurralde historiko horretan, ez baitago inolako tren irisgarririk eta ez baita beren sarbidea errazteko beste sistema alternatiborik erabiltzen", azaldu zuten mobilizazioaren deitzaileek.
Maria Luisa Goikoetxea urduñarraren borroka ere izan zuten gogoan. Renfek duela bost urte egin zituen proba pilotuak Goikoetxearekin, eta Espainiako Senatuak duela hilabete gutxi adierazi zuen irisgarritasuna bermatzeko konpromisoa. Halaber, oraindik ere 12.000 lagun garraio publiko inklusiborik gabe bizi direla salatu du Fekoor elkarteak.
Hori dela eta, epe laburrean beharrezko neurriak hartzea eskatu zuen Fekoorrek; "herri eta auzoetako biztanle guztiei zerbitzua emango dien trenbide-sare irisgarri bat izateko, haien egoera fisikoa, psikikoa edo sentsoriala edozein dela ere". Era berean, Javier Gilek, Fekoor elkarteko zuzendariak, gaineratu zuen: "Hauteskunde-promesak buka daitezela, propaganda hutsa baitira; konponbideak berehala nahi ditugu".