Arrankudiaga-Zolloko XX. mendi martxa egingo dute larunbat honetan, irailaren 30ean. Ibiltariak 07:00etan abiatuko dira oinez eta Untzeta, Bikotxgane, Egiriñao eta Gorbeia mendietako gainak gainditu beharko dituzte Sarriara iritsi aurretik.
Ostean, herrira itzuli eta trikipoteoa izango dute zain 19:30ean. 21:00etan afaria egingo dute Gizarte Etxean indarrak berrartzeko eta jarraian gerriak astintzeko aukera izango dute The Pushermen taldearen musikarekin.
Matxinkorta mendi taldeko kideek gogorarazi dute eguneko hornidura norberaren esku dagoela, hots, bidean ez dela anoa gunerik egongo. Kontuan izan behar da ibilaldia egun osokoa dela. Gainera, antolatzaileek aipatu dute martxa ez dela erregulatuta egongo, ibilbidea ezagutzen duten arduradun batzuk gidatuko dituzte mendizaleak.
Izena emateko 638 513 735 telefonora deitu edo matxinkorta@gmail.com helbide elektronikora deitu beharra dago. Bazkideek 10 euro ordaindu beharko dituzte eta ez-bazkideek 15. Horren barne dago afaria; entsalada, arkumea saltsan, postrea, kafea eta kopa izango dituena.
Urrian trail lasterketa
Mendian korrika aritzea atsegin dutenek beste zita garrantzitsu bat izango dute Arrankudiaga-Zollon aurki. Urriaren 28an, larunbatean, X. trail lasterketa egingo dute eta Txakurkrosak, umeen krosak eta lasterketa nagusiak hartuko dute herria egun osoan zehar. Ohi legez, bazkaria egingo dute Gizarte Etxean eta arratsaldean eta gauean musika eta kontzertuak egongo dira kalean zein Txondor gaztetxean. Lehiaketak webgunea ere badu, jakin beharreko guztiak azaltzeko.