Arrankudiaga trail lasterketak hamar edizio beteko ditu aurten. Urriaren 28an izango da txapelketa eguna eta, azken edizioetan bezalatsu, egun osoko egitaraua prestatu dute antolatzaileek.
Pentsatzekoa den bezala, kirol probek izango dute nagusitasuna urriko azken larunbatean. Lehiatzen lehenak txakurkroseko parte-hartzaileak izango dira, hots, gerritik lotuta aritzen diren korrikalari-txakur bikoteak. Horiek 10:00etan abiatuko dira Garondo auzotik eta 5,9 kilometro eta 290 metroko desnibel positiboa osatu beharko dituzte. 2017an gehitu zuten modalitate hau Arrankudiaga-Zolloko trail lasterketara eta Euskadiko Txakurkros Ligarako puntuagarria da.
Irteera lerroan jartzen hurrengoak haurrak izango dira, Iberlandako Javier Escalza futbol zelaian. Lau mailatan banatuko dituzte eta 12:30etik 13:15era bitartean abiatuko dira txandaka. Txupete kategoriakoek, 2016tik aurrera jaiotakoek, 300 metro egingo dituzte; umetxoak mailakoek, 2014 eta 2015 urteetan jaiotakoek, 700 metro; umeek, 2012 eta 2013 urteetan jaiotakoek, 1.300 metro; eta, irteten azkenek, 2010 eta 2011 urteetan jaiotako gaztetxoek, 1.900 metro osatu beharko dituzte. Korrikalari guztiek oparia izango dute helmugan.
13:00etatik aurrera eta 15:00ak bitarte Gizarte Etxean bazkaltzeko aukera izango dute aldez aurretik izena ematen dutenek eta 16:30ean eta 16:35ean lasterketa luzearen eta laburraren txanda izango da, hurrenez hurren. Irteera eta helmuga herriko plazan izango dute biek.
Lehenek 15,2 kilometro osatu beharko dituzte + 680 metroko desnibelarekin eta bigarrenek 6,6 kilometro eta + 310 metro desnibel. Bi ibilbideak Wickiloc aplikazioan daude eskuragarri eta esteka lasterketaren webgunetik bertatik deskargatu daiteke.
Behin lasterketa guztiak amaituta, 19:00etatik aurrera, musika egongo da kalean eta eta 21:30ean kontzertuak Txondor Gaztetxean.
Izen-emateak
Irailaren 10ean amaitu zen prezio murriztuan izena emateko lehen txanda. Ordutik aurrera eta txapelketa egunaren aurreko egunera arte bigarren txanda egongo da zabalik eta egunean bertan izena emateko aukera ere egongo da lasterketa guztietan. Sportmaniacs atarian eskuratu daiteke dortsala, eta Elexalde 23 etxe azpiko ludotekan, plazan, probak hasi baino ordu erdi lehenago arte banatuko dituzte. Umeak egunean bertan soilik apuntatu ahal dira eta haien dortsala dohainik izango da.
Lasterketa guztiak herrikoiak dira, hau da, ez da lizentziarik behar parte hartzeko. Nork bere dortsala eraman behar du, debekatuta baitago dortsalik gabe edo beste pertsona baten dortsalarekin korrika egitea.
Bazkaria
Nahi duen orok Gizarte Etxean bazkaltzeko aukera izango du 13:00-15:00 tartean. Bi menu emango dituzte aukeran zazpi euroren truke eta urriaren 25a baino lehen eman behar da izena lasterketaren webgunean eskuragarri dagoen formularioa betez edo Sportmaniacs atarian bertan.