Ramon Azkue Elkarteak eta Betiko Lagunak Herritar Taldeak deituta, jende ugari elkartu da Uribarriko hilerrian Ramon Azkue Gorostizaga, Angel Egaña Mendibil eta Gregorio Urkixu Alberdi eusko gudari fusilatuak omentzeko.
Aipamen gehien jaso dituena Ramon Azkue Gorostizaga izan da, bere hilobiaren aurrean antolatu baitute ekitaldia. Berez, gaurko eguna hautatu izana ez da kasualitatea. Izan ere, 1937ko urriaren 15ean erail zuten frankistek arrankudiagarra.
Jeltzalea eta fededun sutsua, Eusko Gudarosteko arduradun nagusia izan zen Azkue eta Santoñan gudariek armak utzi zituztenean, Azkuek nahiago izan zuen eurekin geratzea, ihes egitea baino, aukera izan arren.
Horrekin, nolabait, onartu zuen errepresioa bere gain erori ahal zela eta hala gertatu zen. Duela 86 urte fusilamendu sinbolikoa egikaritu zuten Berriako hondartzan frankistek eta hamalau militante abertzale, sozialista, sindikalista, anarkista eta komunista erail zituzten. Hau da, Eusko Gudarostea osatzen zuten indar politiko ororen ordezkariak hil zituzten.
Beste bi omenduak
Angel Egaña Mendibil Otsanzarrekoa zen. 1914an jaio zen eta 1938ko ekainean hil zuten Valladoliden. Matxinada militarrean parte hartzea leporatu zioten epaitegi militar frankistek. Zehazki, Gorbeian gertatutako bataila batean parte hartzea egotzi zioten. Borroka horretan faxisten agintari bat hil zen. Berez, ez da igandekoa izango Egañak jasoko duen lehen omenaldia. Esaterako, Valladoliden beste 2.650 fusilaturekin batera oroitu zuten.
Gregorio Urkixu Alberdi, berez, Arakaldon jaio zen eta Derion erail zuten 1937ko abuztuan. Bizkaiko minoia izan zen eta Bilboko itsasontzi-espetxeak ez babesteagatik mendeku hartu zuten frankistek.
Ekitaldian Izaskun Trabudua Betikoa Lagunak Herritar Taldeko kideak, Txutxi Ariznabarreta alkateak, Iñaki Garcia Uribek, Iñaki Zarraoak, Iñaki Anasagasti kongresukide jeltzale ohiak eta Urtzi Vergara Ramon Azkue Elkarteko kideak hartu dute hitza.
Gudarien konpromisoa edota omendutako herritarren eta euren ezagun zein lagunen izaera goraipatu dute, eta ez dira falta izan euskal dantzak eta bertsoak ere. Eusko Gudariak abestu ondoren amaitu da ekitaldia.