Arrankudiaga-Zollon ofizialki esan dezakete eskubaloi taldea dutela. Izan ere, tokiko hamar jokalarik (zortzi neskek eta bi mutilek) euren lehen partida ofiziala izan zuten larunbatean Basaurin Arrankudiaga Eskubaloi Talde gisa.
Lehen jardunaldian jarduera berezia izan zuten eta txapelketan jokatuko duten hamabi taldeak egun eta toki berean lehiatu ziren.
Hastapenak ez direnez errazak, lehen norgehiagoka hori ez zen garaipenarekin etorri eta 3-1 galdu zuten Kurutziaga Ikastetxearen kontra. Hala ere, eskola kirolan bere indarrak neurtuko dituen taldeak ibilbide luzea egin du lehiaketara jo baino lehen.
Hain zuzen, iazko ikasturtean hasi ziren prestatzen eta entrenatzen eta aurten egin dute jauzi Bizkaiko benjamin txapelketara, non eskarmentu handiko klubak izango dituzten aurrean: Kukullaga, Basauri, Barakaldo...
Proiektuaren bultzatzailea Alexander Sánchez Hoya da. Berak hartu ditu entrenatzaile eta kirol arduradun lanak. Sánchez Laudioko Eskubaloi Taldean dabil eta jadanik 30 urte baino gehiagoko ibilbidea bete du jokalari gisa.
Esperientzia horrek eraman zuen bere alaba eta herriko ahalik eta ume gehien kirol horretan buru-belarri sartzera eta hasi berri den denboraldian ikusiko dira emaitzak. Alexander Sánchezen helburu nagusia da umeek talde arima egitea eta gozatzea.
Eskubaloiaren zale amorratua, dena den, ez dago bakarrik proiektuan. Alde batetik, Udalak babestu du jarduera eta kantxa margotu du Arrankudiagako frontoian. Eskolako Guraso Elkarteak ere bultzada eman dio egitasmoari eta Laudio Eskubaloi Klubak entrenatzaileak bidaltzen ditu Sánchezek lan egin behar duenean: "Txandaka egiten dut lan eta beti ezin dut entrenatu".