Arrankudiaga-Zolloko Udalak zailtasun handiak dauzka bere eginkizunak betetzeko, ez baitu udal idazkari-kontuhartzailerik. Langile horrek ezinbesteko ardurak hartzen ditu bere gain: udalbatzak deitzea, oniritzia ematea fakturei edo dokumentuei... Ondorioz, nahitaezko pertsona da tokiko erakundearen funtzionamendurako, egunerokoan zein proiektu estrategikoei begira.
Arrankudiaga-Zollon, ordea, duela urte erdi ez dutela langile finko bat postuan. "Bi lagun egon dira, baina jarraikortasunik gabe", adierazi dio Txutxi Ariznabarreta alkateak Aiaraldea Komunikabideari.
Idazkari-kontuhartzailerik gabe lizitazioek, udal osoko bilkurek edota inbertsioek ezin dute aurrera egin, eta ezin dira aurrekontuak onartu ere egin.
Profil tekniko garrantzitsu horren gabeziak aurrekontuak ez onartzea (udal osoko bilkurarik deitu ezin delako) edota inbertsioak eta lizitazioak atzeratzea ekarri du. "Egitasmo batzuk geldirik daude eta soberakinak metatu dira. Kreditu aldaketen bitartez bideratu behar ditugu ahalik eta lasterren. Horrek arriskuan jartzen ditu inbertsioak eta horietara lotuta eskuratutako dirulaguntzak", azpimarratu du alkateak.
Arazoaren iturburua
Erakundean sortu den traba ez da berezkoa, orokorra da. Izan ere, idazkari-kontuhartzaile lan-poltsak agortu dira. Gogoratu beharra dago egonkortze prozesuak gauzatu direla administrazioan eta hori izan dela ondorioetako bat.
Txutxi Ariznabarretak azaldu duenez, "Bizkaiko Foru Aldundia langile bat eskaintzera derrigortuta dago, baina eurek ere arazoak dituzte".
Behin-behineko konponbideak
Udalak bi bide hartuko ditu idazkari-kontuhartzailea izateko. Lehenik eta behin, modu interinoan plaza betetzeko saiakera egingo dute. "Estatu habilitazioa behar duenez, plaza finkoa esleitzeko prozesua oso zaila litzateke, horregatik egingo dugu modu interinoan betetzeko deialdia. Horrek ahalbidetuko digu uda ostean amaitzea prozedura", azaldu du alkateak.
Tartean, erakundearen asmoa da funtzio metaketaren bidez beste udal bateko idazkaria ekartzea herrira. Gauzak horrela, ekainean udalbatza deitu eta aurrekontuak onartuko lituzkete. "Ia bi milioi euroko aurrekontua prest dugu", ziurtatu du Ariznabarretak.