Eguen Zuri eguna dute gaur Arrankudiaga-Zollon. Ohiturari jarraiki, Inauterietako ostegunean, eskolako neska-mutilek herriko auzotik auzora igaro dute goiza, urteroko kanta propioa abesten.
Ikasle guztiek eskolako plazan kantatu dute lehendabiziko aldiz, eta taldetan banatu eta herriko bazter ezberdinetara jo dute ostean. Eguerdi aldera Garondon bildu dira denak, goizari amaiera emateko.
Arratsaldean, 16:15ean, berriro aterako dira eskolako plazara, azken aldiz abesteko eta txokolatada egiteko. Etxez etxe bildutako dirua Palestinako zenbait familientzat izango da.
Tradizio zaharra bizirik
Tradizio zaharrak bizirik mantentzeko gaurkotu behar dira maiz. Izan ere, garai batean oilar bat eramaten zuten gazteek saski batean, eta kantuan ibili eta gero makil-kolpez sakrifikatzen zuten. Gaur egun, ordea, Pedro Bidaniaren margolan bat daramate Arrankudiagako gazteek oilarra irudikatzen, estandarte gisa.
Kantatzen dituzten koplak, ordea, ia ehun urte abesten ziren berberak dira:
Eguen zuri egune
kolore ederreko egune
mendi gainean lainu parduak
eta azpian eguzki zuria.
Herri honetako neska-mutilak
zuen aurrera gatoz gaur
triparentzako eskatzen dogu
solomorik ahal badozu.
Oilar gorria ta bai ederra
ta gure palu daukagu
honentzat ere eskatzen dogu
zeredozer ahal badozu.
Etxeko andrie begire dago
zeruko aingeru dirudi
errukitu gugaz eta ahal badozu
ogerlekotxu bat emoiguzu.
Orain hemendik bagoaz eta
agur hurrengo artian
agur hurrengo artian
osasun onagaz bizi. Eup!!
Argazkiak: Txomin Egiluz eta Aiaraldea Komunikabidea