Xarmanta jatetxeak gaur itxiko ditu ateak, orain arteko kudeatzaileak erretiroa hartuko duelako. Egoera horrek eskualdeko ostalaritza eskaintzan dagoen txoko bitxiaren itxiera ekarriko du epe laburrera, baina galdera ikur handia marraztu du etorkizunera begira.
Izan ere, Arrankudiaga-Zolloko Udala da eraikinaren jabea eta berriro irekitzeko zein baldintza behar dituen aztertu behar du. Txutxi Ariznabarreta alkateak azaldu dio Aiaraldea Komunikabideari higiezinak saneamendu eta irisgarritasun arazo handiak dituela eta txosten teknikoa osatu behar dutela ezagutzeko zein neurri hartu behar dituzten berriro lizitazioa deitzeko.
"Saneamendu arazoak larriak dira eta irisgarritasuna ere oztopoa da goiko solairuan. Agian kanpoan kokatutako igogailua beharrezkoa litzateke. Beste aukera bat da taberna gisa irekitzea eta ez jatetxe moduan", aipatu du alkateak.
Edonola ere, udalburuak berak azaldu duenez, momentuz, dena espekulazioa da txosten teknikoa egin arte, baina iragarri du erreforma osoak inbertsio garrantzitsua sortuko lukela.