Artziniega Museoak Eusko Jaurlaritzako eta Arabako Foru Aldundiko finantzazioa eskuratu du 2016. urterako. Hala, Eusko Jaurlaritzaren aurrekontuetan 30.000 euro aurreikusi dituzte eta Arabako Foru Aldundiak 35.000 eurorekin lagunduko du.
Museoaren kudeatzaileak -Artea Elkarte Etnografikoak- egoera ekonomikoa azaltzen zuen gutuna bidali zien Eusko Legebiltzarreko, Batzar Nagusietako eta Udalbatzako talde politiko guztiei; eskatzeko aurrekontuetan Artziniega Museoaren proiektuaren finantzaziorako partidak txertatu zezaten.
Hala, bi instituzioen aurrekontuak eztabaidatu ziren bitartean, Legebiltzarrean PSE-EEk eta EH Bilduk aurreko urtean bezala Museoarentzako 30.000 euroko saila aurrekontuetan sartzeko eskaera egin zuten.
Arabako Biltzar Nagusietan ere, EH Bilduk, PSE-EEk eta Irabazik 30.000 euroko saila sartzea eskatu zuten, Ahal Duguk aldiz, 35.000 euroko saila eskatu zuen.
Legebiltzarreko eta Batzar Nagusietako talde politikoen eskaerak onartu izanak, Artziniega Museoaren 2016ko egoera ekonomikoa egonkortu du.
Etorkizuna kolokan
Duela urte batzuk proiektuaren finantzaketa okertu zenetik, Museoaren eta horrek biltzen duen ondarearen egonkortasuna kolokan jarri zen. Horren guztiaren etorkizuna, Artea Etnografia Elkarteak noizbehinka jasotako diru-laguntzek ahalbidetu dute. Horrela, Museoaren etorkizuna ezin zen bermatu ezta elkarteak urtean gauzatzen dituen ekintzak ere.
Artea Etnografia Elkarteko kideek adierazi dute berri ona izan dela Eusko Jaurlaritzako eta Arabako Foru Aldundiko aurrekontuetan Museoarentzako sailak txertatzea baina horrek, Museoaren finantzazioa eta zabalera bakarrik 2016an bermatuko du.
Hala, ezin dute hurrengo urteetako egonkortasun ekonomikoa ziurtatu. Halaber, elkarteko kideek Museoaren proiektua defendatzen jarraitzeko hautua egin dute.