Hainbat ikastaro aurkeztuta ezagutzera eman zen Artziniegako Rock Elkarteak. Musika estilo ezberdinak jorratuko dituzten elkartean, 15 pertsonek eman dute izena jada. Hala, ikastaro ezberdinetan parte hartu nahi duen edonor gaur arratsaldean antolatu duten batzar irekira bertaratzeko aukera dauka.
Nahiz eta Rock elkartea izan, musikaren arlo ezberdinak ere jorratuko dituzte eta aurkeztu dituzten ikastaroak horren isla dira. Hala, gitarra, baxua, bateria eta ahotsa lantzeaz gain, trikitixa, pandero, txistu eta biolinean ere trebatzeko aukera zabaldu dute. Baita ere, musikan hasteko tailer ezberdinak eskaini dituzte eta denborarekin ikasleek musika taldeak sor ditzaten laguntza eskaintzeko prest daude.
Artziniegako Rock elkartea, herriko musika zaletasuna handitzeko sortu zen eta horretarako, ikasleekin ekintza ezberdinak antolatzea espero dute eta urtean zehar antolatzen diren beste ekintzetan musika presente egotea ere bai.
Beraz, Artziniegan musika ikasteko asmoa daukan edonor gaur arratsaldeko 19etan Udaletxe Zaharrera bertaratzeko aukera dauka ikastaro ezberdinen informazioa jasotzeko.